Mojemoj.com

Best Gujarati Blog

બાળકને સ્વિમિંગ-પૂલમાં લઈ જતા પહેલા દરેક આદર્શ માં-બાપે વાંચવા જેવી અમુક વાત

ઝાડા-ઊલટી જેવા પાણીજન્ય રોગોથી લઈને આંખ અને કાનના ઇન્ફેક્શનનું કારણ આ પૂલ હોઈ શકે છે. વેકેશનમાં જ્યારે બાળક પૂલમાં સ્વિમિંગ શીખે કે ફક્ત ધુબાકા મારી આનંદ લેતું હોય ત્યારે તેની હેલ્થ પર અસર ન થાય એ માટે સાવધાની રાખવી ખૂબ જરૂરી છે

અંધેરીમાં રહેતી માલતી પોતાના ૩ વર્ષના દીકરા તન્મયને ઉનાળાની ગરમીમાં મજા કરાવવા માટે તેની ક્લબના સ્વિમિંગ-પૂલમાં લઈ જતી હતી. બાળક નાનું હતું, પરંતુ તે જોતી કે તેની ક્લબમાં એ ઉંમરનાં ઘણાં બાળકો આવે છે તો તેને લાગતું કે સ્વિમિંગ શીખે- ન શીખે પાણીમાં અડધો કલાક ધુબાકા મારી લે તો પણ ઘણું કહેવાય. બાળકને પણ શરૂઆતમાં બીક લાગતી, પરંતુ પછી તેને પણ ખૂબ મજા આવતી. માલતીને થતું સારું જ છે, પરંતુ તકલીફ ત્યારે થઈ જ્યારે તન્મયને એક જ અઠવાડિયાની અંદર ડાયેરિયા થઈ ગયા. તેની તબિયત એટલી કથળી કે અમુક કલાકો હૉસ્પિટલમાં રાખવો પડ્યો.

પવઈમાં રહેતી પાંચ વર્ષની શ્રેયાને વેકેશન પડ્યું એટલે તે દરરોજ તેના પપ્પાની સાથે ઘરની નજીકના સ્વિમિંગ-પૂલમાં સ્વિમિંગ શીખવા જતી. બે અઠવાડિયાંમાં તો તે સરસ તરતાં શીખી ગઈ હતી. પરંતુ તેને અચાનક જ યુરિનમાં બળતરા થવા લાગી. ડૉક્ટર પાસે ગયા ત્યારે ખબર પડી તેને યુરિનરી ટ્રૅક્ટ ઇન્ફેક્શન થઈ ગયું છે. બીજાં બે અઠવાડિયાં શ્રેયાને પૂલથી દૂર રાખવાની સલાહ આપવામાં આવી. અત્યારે તેની દવા ચાલે છે.

એક સમય હતો જ્યારે ગામની વહેતી નદીમાં બાળકો ધુબાકા લગાવતાં. શહેરોમાં આ નદીઓનું સ્થાન સ્વિમિંગ-પૂલે લીધું છે. ઉનાળો છે અને એમાં પણ વેકેશન. જો તમે કોઈ ક્લબના મેમ્બર હો કે ઘરની નજીક આવેલા સ્વિમિંગ-પૂલની મુલાકાત તમે લીધી હોય તો તમને ખ્યાલ હશે કે એપ્રિલ-મે અને જૂન, આ ત્રણ મહિના સ્વિમિંગ-પૂલ નાનાં ભૂલકાંઓથી ભરેલા જ જોવા મળશે. માંડ ચાલતાં શીખ્યાં હોય એવાં નાનાં ટબૂડિયાં સ્વિમિંગ-કૉસ્ચ્યુમ પહેરીને પૂલમાં ધુબકા લગાવતાં હોય અને કિલકારી કરતાં હોય એ જોવાનો આનંદ જ જુદો છે. દરેક ઉંમરના બાળકને પાણી પ્રિય હોય છે. એમાં તેમને મજા જ આવ્યા કરે છે. પરંતુ સ્વિમિંગ-પૂલ સાથે અમુક પ્રકારનાં રિસ્ક પણ જોડાયેલાં છે, જે રિસ્કને સમજવાં જરૂરી છે. સેફ્ટી અને હાઇજીનનું ધ્યાન રાખવા છતાં કુમળાં બાળકોને હેલ્થ-પ્રૉબ્લેમ્સ આવી શકે છે.

બાળકની યોગ્યતા

સ્વિમિંગ-પૂલમાં આમ તો કોઈ પણ બાળક કોઈ પણ ઉંમરે જઈ શકે એવું લોકો માનતા હોય છે. ખાસ કરીને જો સોસાયટીમાં પૂલ હોય કે કોઈ પ્રાઇવેટ જગ્યાએ પૂલ હોય તો ખૂબ નાની ઉંમરથી બાળકો એમાં જતાં હોય છે. પરંતુ તમારા બાળકને ક્યારે પૂલમાં મોકલવું એ જરા સમજી લેવા જેવું છે. આ બાબતે સમજાવતાં ઝેન હૉસ્પિટલના પીડિયાટ્રિશ્યન ડૉ. કવિતા ગોહિલ કહે છે, ‘સ્વિમિંગ શીખવાડવાની આદર્શ ઉંમર ૪-૫ વર્ષની ગણી શકાય. એ પહેલાં જો પેરન્ટ્સ પોતાની સાથે બાળકને ટ્યુબની મદદથી કે બીજા કોઈ સપોર્ટ સાથે ફક્ત ફ્લોટિંગ માટે કે મજા માટે પુલમાં લઈ જવા ઇચ્છતા હોય તો જઈ શકાય, પરંતુ આ બાબતે સાવધાની જરૂરી છે. ૪-૫ વર્ષે પણ જ્યારે બાળક સ્વિમિંગ શરૂ કરે ત્યારે પણ શરૂઆતમાં સતત તેની સાથે કોઈ હોય એ જરૂરી છે. આ સિવાય જો તમારું બાળક વારંવાર માંદુ પડતું હોય, તેની ઇમ્યુનિટી ડેવલપ ન થઈ હોય, તેને સતતશરદી-ઉધરસ રહેતાં હોય, તેને શ્વાસની કોઈ તકલીફ હોય કે બ્રૉન્કાઇટિસની ફરિયાદ અવારનવાર રહેતી હોય તો તેને સ્વિમિંગ ચાલુ કરાવતાં પહેલાં તેના ડૉક્ટરની સલાહ ચોક્કસ લેવી.’

પેરન્ટ્સની જવાબદારી

અમુક પ્રકારની સાવધાની અત્યંત જરૂરી છે. એ વિશે વાત કરતાં ડૉ. કવિતા ગોહિલ કહે છે, ‘તમે જે જગ્યાએ બાળકને લઈ જાઓ છો ત્યાં કયા પ્રકારનું હાઇજીન છે, કેવી સિક્યૉરિટી છે એની બરાબર તપાસ કરો અને પછી જ બાળકને ત્યાં મોકલો. બાળક શરૂઆતમાં શીખતું હોય ત્યારે તેના નાકમાં અને મોઢામાં આ પાણી જાય જ છે. જો પાણી મલિન હશે તો બાળક માંદું પડવાનું જ છે. આ સિવાય જો પૂલમાં એકસાથે ખૂબ બધાં બાળકો હશે તો પણ રિસ્ક વધવાનું જ છે એટલે અતિ ભીડમાં તેને ન લઈ જાઓ. બીજી એક મહત્વની જવાબદારી એ છે કે તમારું બાળક જો થોડું પણ માંદું હોય તો તેને પૂલમાં ન જ લઈ જાઓ, કારણ કે એથી માંદગી તો વધશે જ પરંતુ એને કારણે બીજાં બાળકો પણ માંદાં પડશે.’

ફાયદા

સ્વિમિંગ-પૂલ સાથે અમુક પ્રકારનાં રિસ્ક જોડાયેલાં છે એ વાત સાચી, પરંતુ એને લીધે બાળકોને આ ખુશીથી વંચિત રાખવાનું યોગ્ય ન ગણાય. બીજું એ કે નાનાં બાળકો કે આમ તો કોઈ પણ ઉંમરનાં બાળકો માટે સ્વિમિંગ બેસ્ટ એક્સરસાઇઝ છે. તેમના ગ્રોથ યર્સમાં શરીરને આ રીતે કસવામાં આવે તો સ્નાયુઓ મજબૂત બને છે અને હાથ-પગની સ્ટ્રેન્ગ્થ વધે છે. ઘણાં બાળકો, જે ક્યારેક જમવામાં નખરાં કરતાં હોય છે તેમને આ પ્રકારની એક્સરસાઇઝ ખૂબ ફળે છે. સ્વિમિંગ કર્યા પછી તે એવાં થાકે છે કે ફટાફટ જમી લે છે, વ્યવસ્થિત ટાઇમ પર સૂઈ જાય છે. ઓવરઍક્ટિવ બાળકો, જે વેકેશનમાં કંટાળે અને ઉધમ મચાવે એવાં બાળકો માટે સ્વિમિંગમાં તેમની એનર્જી‍ ઘણી ખર્ચાય છે અને એથી તેઓ થોડાં શાંત બને છે. આ સિવાય પાણી એક પંચમહાભૂતનું મહત્વનું તત્વ છે. એમાં રહેવાથી બાળકની આંતરિક શક્તિઓ ખીલે છે. આપણાં શહેરી બાળકોને વહેતી નદી નસીબમાં ન હોય તો કંઈ નહીં, પરંતુ સ્વિમિંગ-પૂલ એનો ખોટો વિકલ્પ પણ નથી. એ હકીકત છે કે સ્વિમિંગ-પૂલમાં અમુક પ્રકારનાં હેલ્થ-રિસ્ક જોડાયેલાં છે, પરંતુ એમ સમજીને ડરી જવાની જરૂર નથી. જરૂરી કાળજી લઈને બાળકને એમાં ચોક્કસ મોકલી શકાય છે.

શું થઈ શકે?

બાળક સ્વિમિંગ-પૂલમાં જાય તો અમુક પ્રકારના હેલ્થ-પ્રૉબ્લેમ્સ તેને આવી શકે છે. આ કયા હેલ્થ-પ્રૉબ્લેમ છે એ જાણીએ ચિયર્સ ચાઇલ્ડ કૅર, કેમ્પ્સ કૉર્નરના પીડિયાટ્રિશ્યન ડૉ. પંકજ પારેખ પાસેથી.

૧. બાળકને પાણીજન્ય રોગોનું રિસ્ક વધી શકે. આવા રોગો એટલે ઝાડા-ઊલટી કે ટાઇફૉઇડ. મલિન કે દૂષિત પાણીને લીધે આવા રોગ થાય છે. જો પૂલનું હાઇજીન બરાબર ન હોય તો આવું થઈ શકે છે. ઘણી વાર જે બાળકને આવા રોગો હોય તે બાળક પૂલમાં આવે તો બીજા બધા જ બાળકને આવાં ઇન્ફેક્શન લાગવાની શક્યતા રહે છે.

૨. આ સિવાય ઘણી વાર બાળકો પૂલમાં વધુ સમય રહે અને પૂલની બહાર પણ ખૂબ ભીનાં થઈને રહે તો તેમને સાઇનસની તકલીફ થઈ શકે છે. સતત શરદી-ખાંસી પણ રહે.

૩. આ સિવાય સ્વિમિંગ-પૂલમાં પાણીને જંતુમુક્ત કરવા માટે વાપરવામાં આવતું ક્લોરીન બાળકની નાજુક ત્વચા પર પણ અસર કરી શકે છે. ચાંઠાં, ખંજવાળ, ઇન્ફેક્શન કે સનબર્ન જેવા ત્વચા સંબંધિત પ્રૉબ્લેમ્સ ઊભા થઈ શકે છે. આ માટે સારી સનસ્ક્રીન લગાવવી જરૂરી છે જે ફક્ત સૂર્યનાં કિરણોથી જ નહીં, બાળકને ક્લોરિનની અસરથી બચાવે છે.

૪. બાળકોમાં આવા કેમિકલયુક્ત પાણીને કારણે આંખ અને કાનનું ઇન્ફેક્શન પણ ખૂબ જ સામાન્ય છે, જેનાથી બચવા સ્વિમિંગ ગ્લાસિસ પહેરવા અને કાનને વ્યવસ્થિત સાફ રાખવા જરૂરી છે.

૫. પૂલને કારણે યુરિનરી ટ્રૅક્ટ ઇન્ફેક્શન નાની છોકરીઓમાં થવાની શક્યતા વધુ છે. આ પ્રૉબ્લેમથી બચવા એ ભાગને વ્યવસ્થિત સાફ રાખવો. સ્વિમિંગ વેઅર અત્યંત ટાઇટ ન હોય એનું ધ્યાન રાખવું અને બાળકોને સ્વિમિંગ કરતાં પહેલાં અને પછી ટૉઇલેટ જવાની આદત નાખવી, જેથી કોઈ પણ બાળક યુરિનને રોકી ન રાખે કે પછી પૂલમાં તેમને યુરિન પાસ કરવું ન પડે.

સાભાર : ગુજરાત મીડ ડે

Leave a Reply

Mojemoj.com © 2016 Frontier Theme
error: Content is protected !!